سوئی ناردرن گیس کو مالی سال 22-2021ء کی دوسری سہ ماہی کے لیے 6،887 ملین روپے کا بعد از ٹیکس منافع

تفصیلات کے مطابق سوئی ناردرن گیس نے 31 دسمبر 2021ء اور 31 مارچ 2022ء کو ختم ہونے والی مدت کے لیے کمپنی کی تاریخ کے بلند ترین ششماہی اور نو ماہی نتائج کا اعلان کیا ہے۔ 

مالی سال 22-2021ء کی دوسری سہ ماہی کے لیے 6،887 ملین روپے کے بعد از ٹیکس منافع کا اعلان کیا گیا ۔ گزشتہ برس اسی مدت میں کمپنی کو 5،917 ملین روپے کے بعد از ٹیکس منافع حاصل ہوا تھا۔ گزشتہ برس اسی مدت کے دوران 33۔9 روپے کے منافع فی حصص  کے مقابلے میں 86۔10 روپے کا منافع فی حصص حاصل ہوا۔

مالی سال 22-2021ء کی تیسری سہ ماہی کے لیے 9،437 روپے کے بعد از ٹیکس کا منافع ہوا۔ گزشتہ برس اسی مدت میں کمپنی کو 8،939 روپے کا بعد از ٹیکس منافع حاصل ہوا تھا۔ گزشتہ برس اسی مدت میں 14.09 روپے کے منافع فی حصص کے مقابلے میں 14.88 روپے کا منافع فی حصص حاصل ہوا۔ کمپنی کی جانب سے مالی سال 22-2021ء کی دوسری سہ ماہی کے لیے 25 فیصد کے درمیانی کیش ڈیوڈنڈ بھی تجویز کیا گیا۔

کمپنی کے منافع میں یہ تاریخی اضافہ سوئی ناردرن گیس کے مینجنگ ڈائریکٹر علی جے ہمدانی کی قیادت میں یو ایف جی میں کمی کے پروگرام پر بھرپور عملدرآمد سے ممکن ہوسکا۔  یہاں یہ واضح کرنا ضرورری ہے کہ سوئی ناردرن گیس کو حجم اور شرح دونوں اعتبار سے یو ایف جی کمی میں کامیابی حاصل ہوئی۔ مالی سال 22-2021ء کی دوسری اور تیسری سہ ماہی کے دوران یو ایف جی 15،011 ایم ایم سی ایف (7.56 فیصد) اور 24،755 ایم ایم سی ایف (8.45 فیصد) سے بالترتیب 13،286 ایم ایم سی ایف (7.22 فیصد) اور 21،248 ایم ایم سی ایف (7.79 فیصد) تک کم ہوگئی۔

ایم ڈی سوئی ناردرن گیس علی جے ہمدانی نے اپنے بیان میں کہا کہ انہیں سوئی ناردرن گیس کا ہر قسم کی مشکلات سے کامیابی کے ساتھ نمٹنے کی صلاحیت پر بھرپور اعتماد ہے۔ انہوں نے مذکورہ مالی نتائج کے حصول میں کمپنی انتظامیہ اور ملازمین کے کردار کو سراہا۔ ان کا کہنا تھا کہ بورڈ آف ڈائریکٹرز کی مسلسل سپورٹ کے بغیر ان نتائج کا حصول ناممکن تھا۔

ایم ڈی سوئی ناردرن گیس نے مزید کہا کہ کمپنی منافع کو درپیش ممکنہ خطرات میں کمی کے لیے کثیر الجہتی حکمت عملی پر عمل پیرا ہے اور ساتھ ہی کمپنی کو استحکام پذیر مستقبل دینے کے لیے بزنس کے نئے مواقع بھی تلاش کیے جارہے ہیں۔ انہوں نے امید ظاہر کی کہ انتظامیہ اور ملازمین کی محنت سے کمپنی بہتر سے بہتر نتائج حاصل کرتی رہےگی۔