سکیورٹی فورسز نے مردم شماری ٹیم پر حملے میں ملوث دہشتگرد ہلاک

ڈی آئی خان: سیکیورٹی فورسز نے پیر کے روز ضلع ٹانک کے علاقے رگزئی میں مردم شماری کی سیکیورٹی ڈیوٹی پر تعینات پولیس پارٹی پر حملے کے بعد جاری آپریشن کے دوران مطلوب دہشت گرد کمانڈر عبدالرشید عرف رشیدی کو شدید فائرنگ کے تبادلے میں ہلاک کردیا۔

انٹر سروسز پبلک ریلیشنز (آئی ایس پی آر) کے مطابق رگزئی حملے میں پولیس اہلکاروں نے بہادری سے دہشت گردوں کا مقابلہ کیا۔ فائرنگ کے تبادلے میں ایک پولیس اہلکار نے بھی جام شہادت نوش کیا۔

اطلاع ملنے پر سیکورٹی فورسز نے علاقے کو گھیرے میں لے لیا اور فرار ہونے کے تمام ممکنہ راستوں کو بند کر دیا۔ فرار ہونے والے دہشت گردوں کو ضلع ڈیرہ اسماعیل خان کی تحصیل کلاچی کے علاقے گڑہ گلداد جنرل میں روک لیا گیا۔

اس کے بعد ہونے والی فائرنگ کے تبادلے میں دہشت گرد کمانڈر رشیدی مارا گیا۔ وہ سیکورٹی فورسز کے خلاف متعدد دہشت گردانہ کارروائیوں کے ساتھ ساتھ بے گناہ شہریوں کے قتل میں ملوث ہونے پر پولیس کو مطلوب تھا۔

ہلاک دہشت گرد سے اسلحہ اور گولہ بارود بھی برآمد ہوا ہے۔