پاکستان نے چین سے ایک اور کورونا ویکسین "کورونا ویک " خرید لی

مقامی میڈیا کے مطابق  حکومت پاکستان نے چین سے کورونا ویکسین  " کرونا ویک" کے لیے خریداری کا معاہدہ کر لیا ہے، کرونا ویک چینی کمپنی سائینو ویک لائف سائنسز نے تیار کی ہے۔

مقامی میڈیا کے مطابق  سائینو ویک نے پاکستان کو  ویکسین فراہمی کی یقین دہانی کرا دی ہے، سائینو ویک  آغاز میں محدود پیمانے پر کورونا ویکسین فراہم کرے گی۔

پاکستان میں ڈریپ " کورونا ویک"  ویکسین کے ہنگامی استعمال کی اجازت دے چکی ہے،اس کے علاوہ  لاہور کی ایک پرائیویٹ کمپنی کو  بھی " کورونا ویک" ویکسین کا اجازت نامہ مل چکا ہے۔"کورونا ویک"  ان ایکٹیویٹڈ ویکسین 2 ڈوزز پر مشتمل ہے  اور یہ منفی 2 تا 8 درجہ حرارت پر محفوظ کی جاتی ہے۔

خیال رہے کہ  چین نے جولائی 2020 میں " کورونا ویک"  کے ہنگامی استعمال کی اجازت دی تھی  اس کے فیز ون اور ٹو کلنیکل ٹرائلز چین میں کیےگئے تھے  جبکہ  فیز 3 ٹرائلز لاطینی امریکا، یورپ، ایشیا، برازیل، ترکی، انڈونیشیا، فلپائن میں کیےگئے تھے۔ترکی کے فیز 3 ٹرائلز میں ویکسین 83.5 فی صد معیاری ثابت ہوئی، انڈونیشیا کے فیز 3 ٹرائلز میں ویکسین 65.3 فی صد معیاری ثابت ہوئی تھی۔

واضح رہے کہ میکسیکو، تیونس، زمبابوے، آذربائیجان، ملائیشیا، سنگاپور، ہانگ کانگ، فلپائن، تھائی لینڈ "کورونا ویک"  ویکسین کی منظوری دے چکے ہیں۔ جبکہ سائینو ویک رواں ماہ مختلف ممالک کو ویکسین کی 7 کروڑ ڈوز فراہم کر چکی ہے۔