پی ایس ایل 6 میں تماشائیوں کو رواں ہفتے اجازت ملنے کا امکان

جی این این کے مطابق پاکستان سپر لیگ کا چھٹا سیزن شروع ہونے میں چند دن باقی رہ گئے تاہم شائقین کرکٹ سٹیڈیم میں میچ دیکھنے کے حوالے سے  تاحال تجسس کا شکار ہیں ، اس حوالے سے انتہائی خبر سامنے آگئی ۔ پی سی بی نے حکومت سے پاکستان سپرلیگ کے چھٹے سیز ن میں 25 فیصد شائقین کرکٹ کی اجازت مانگی ہے ۔  

ذرائع نے بتایا کہ پی سی بی کی جانب سے چیف ایگزیکٹو وسیم خان اور چیف آپریٹنگ آفیسر سلمان نصیر نے این سی او سی کو بریفنگ دی کہ قذافی اسٹیڈیم میں 6500 اور نیشنل اسٹیڈیم کراچی میں 8 ہزار تک فینز کی اجازت دی جائے ، جس کے تحت تین تین سیٹوں کے گیپ سے شائقین کرکٹ کو بٹھایا جائے گا ۔ 

پی سی بی حکام نے کہا کہ ایک ہی فیملی کے افراد کے لیے سیٹوں کے درمیان گیپ رکھنے کی شرط نہیں ہوگی ، جبکہ اجازت ملنے پر شائقین کرکٹ کے لیے کورونا وائرس ٹیسٹ کی شرط نہیں ہوگی ۔ ذرائع نے مزید بتایا کہ پی سی بی کو این سی او سی کی جانب سے جواب جمعرات تک ملنے کی امید ہے ، جبکہ جواب ملنے کے بعد ٹکٹوں کی سیل کا عمل شروع کیا جائے گا ۔

واضح رہے کہ پی ایس ایل کا چھٹا سیزن 20 فروری سے کراچی میں شروع ہورہا ہے، جس کے ابتدائی 20 میچز شہر قائد میں کھیلےجائیں گے جبکہ آخری 14 میچز لاہور میں ہوں گے۔