الیکڑونک ووٹنگ مشین کے استعمال کی تجویز مسترد کرتے ہیں: شہبازشریف

تفصیلات کے مطابق  شہبازشریف کا کہنا تھا کہ انتخابی اصلاحات کا حساس کام پوری قوم کی منشا اور اعتماد سے ہوتا ہے، عوام کی امنگوں اور اعتماد کا مظہر پارلیمان ہے جسے تین سال سے تالا لگایا گیا۔انہوں نے مزید کہا کہ انتخابی اصلاحات تمام فریقین کی مشاورت اور اتفاق رائے سے ممکن ہوتی ہیں، ایک فردکی خواہش یا حکم پر ایسے اہم قومی کام سرانجام نہیں پاتے۔

اپوزیشن لیڈر نے کہا کہ نون لیگ نے 2018ء میں پی ٹی آئی سمیت تمام سیاسی جماعتوں کی مشاورت سے انتخابی اصلاحات کی تھیں، ہمارے دور میں ہونے والی انتخابی اصلاحات پر کسی کو اعتراض نہیں تھا۔ان کا کہنا ہے کہ سب کے اتفاقِ رائے کا مظہر اور دستخط شدہ انتخابی اصلاحات کی وہ تاریخی دستاویز آج بھی موجود ہے۔

پاکستان مسلم لیگ (ن) کے صدر اور قائد حزب اختلاف شہبازشریف نے الیکڑانک ووٹنگ مشین کے استعمال کی تجویز مسترد کر دی

الیکڑانک ووٹنگ کانظام تمام دنیانے مسترد کیا، پاکستانی الیکشن کمشن ناقابل عمل قرار دے چکا ہے؛ ایک فردکی خواہش یا حکم پر ایسے اہم قومی کام انجام نہیں پاتے

— President PMLN (@president_pmln) May 2, 2021

شہباز شریف نے کہا کہ جس وقت اپوزیشن مثبت تجاویز اور میثاقِ معیشت کی بات کر رہی تھی تو این آر او کا شور کر کے ان کی توہین کی گئی۔

ان کا کہنا ہے کہ انتخابی اصلاحات ہم کر سکتے ہیں، سیاسی مخالفین کو ساتھ لے کر چلنے، ان کی تجاویز کو اپنانے کا حوصلہ ہم میں ہے۔قومی اسمبلی میں قائدِ حزبِ اختلاف نے مزید کہا ہےکہ ملک کی ساکھ انصاف، شفافیت اور قانون کی حکمرانی سے بہتر ہوتی ہے، الیکٹرانک ووٹنگ مشینوں سے نہیں۔

صدر نون لیگ کا یہ بھی کہنا ہے کہ الیکٹرانک ووٹنگ کے بجائے تباہ معیشت، مہنگائی اور بے روزگاری سے مرتے عوام کی فکر کریں۔