پیٹرولیم مصنوعات کی قیمتوں میں اضافے کا امکان

اسلام آباد: حکومت کی جانب سے غریب عوام کی مشکلات میں مزید اضافے کا امکان ہے کیونکہ 16 ستمبر سے 30 ستمبر تک ملک میں پیٹرولیم مصنوعات کی قیمتوں میں زبردست اضافے کا امکان ہے۔

عالمی سطح پر اجناس کی قیمتوں میں اضافے کے باعث نگراں حکومت ایک بار پھر پیٹرولیم مصنوعات کی ایکس ڈپو قیمتوں میں اضافے کا اعلان کر سکتی ہے۔

آئل سیکٹر کے اندازوں کے مطابق ستمبر کے اگلے 15 دنوں میں پیٹرول کی قیمت میں 10 روپے فی لیٹر اور ہائی اسپیڈ ڈیزل (ایچ ایس ڈی) کی قیمت میں 9 روپے فی لیٹر اضافے کا امکان ہے۔

اس کے علاوہ مٹی کا تیل 10 روپے فی لیٹر اور لائٹ ڈیزل 8 روپے فی لیٹر مہنگا ہو سکتا ہے۔

حکومت نے بین الاقوامی مالیاتی فنڈ (آئی ایم ایف) کی شرائط کو پورا کرنے کے لیے پیٹرول پر 60 روپے فی لیٹر اور ہائی اسپیڈ ڈیزل پر 50 روپے فی لیٹر پیٹرولیم لیوی عائد کردی ہے۔

دوسری جانب، حکومت پاکستان اسٹیٹ آئل (PSO) کو پیٹرول اور HSD پر 3 روپے فی لیٹر کی ایکسچینج ریٹ ایڈجسٹمنٹ کی اجازت دے سکتی ہے۔

معاہدے کے تحت پاکستان نے آئی ایم ایف سے وعدہ کیا ہے کہ وہ اضافی بنیادوں پر زیادہ سے زیادہ لیوی 60 روپے فی لیٹر کرے گا تاکہ پیٹرولیم ڈویلپمنٹ لیوی کی اوسط لاگت 55 روپے فی لیٹر تک پہنچ جائے۔