ماہرین کا دماغی صحت میں بہتری کیلئے فیس بک سے دوری کا مشورہ ، تحقیق

سوشل میڈیا  نے ہزاروں میل دور افراد کو ایک دوسرے سے جوڑ دیا ہے، جہاں سوشل میڈیا  کی ویب سائٹس کے بہت سے  فائدے ہیں  وہیں اس کے   خوفناک نقصانات بھی ہیں۔

مقامی میڈیا کے مطابق  امریکی ماہرین نے دماغی صحت میں بہتری کےلیے فیس بک سے دوری کا مشورہ دے دیا ہے۔

نیویارک یونیورسٹی اور اسٹینفورڈ یونیورسٹی کی جانب سے  سوشل میڈیا کے انسانی ذہن پر پڑنے والے اثرات سے متعلق تحقیق کی گئی جس میں انہوں نے بتایا ہے کہ  اگر سوشل میڈیا صارفین فیس بک کا استعمال ترک کردیں تو دماغی صحت میں نمایاں بہتری آسکتی ہے۔

اس تحقیق میں امریکی ماہرین نے انکشاف کیا ہے کہ  روزانہ 15 منٹ سے زائد سوشل میڈیا کا استعمال کرنے والوں کے مقابلے میں وہ صارفین جنہوں نے فیس بک کا استعمال مکمل طور پر بند کردیا ہے ان کی سماجی سرگرمیوں میں کافی بہتری آئی ہے۔

تحقیق میں کہا گیا ہے کہ  جن لوگوں  نے فیس بک  کا استعمال بند کیا  انہوں نے رشتے داروں اور دوستوں کو پہلے کی نسبت زیادہ وقت دینا شروع کردیا اور اس کے ساتھ ساتھ  ان کی جسمانی اور دماغی صحت میں کافی بہتری آئی ہے۔