لاہور ہائیکورٹ بار ایسوسی ایشن کے سالانہ انتخابات کے لیے پولنگ شروع ہو گئی

لاہور: لاہور ہائی کورٹ بار ایسوسی ایشن (ایل ایچ سی بی اے) کے سالانہ انتخابات کے لیے پولنگ کا عمل شروع ہوگیا جو صبح 9 بجے سے شام 5 بجے تک جاری رہے گا۔

لاہور ہائیکورٹ بار کے انتخابات میں پولنگ بائیو میٹرک سسٹم کے تحت ہو رہی ہے۔

صدر کے عہدے کے لیے آزاد احسن بھون گروپ کے ثاقب اکرم گوندل اور حامد خان پروفیشنل گروپ کے اسد منظور بٹ کے درمیان سخت مقابلہ ہوگا۔

نائب صدر کے عہدے کے لیے 6 امیدوار حسیب بن یوسف، عبدالرحمن رانجھا، ملک فدا حسین، مظہر عباس سیال، میاں سردار علی گہلان اور میاں وحید میدان میں ہیں۔

سیکرٹری کے عہدے کے لیے تین امیدواروں کے درمیان مقابلہ ہوگا جن میں آصف محمود چوہان، قادر بخش چاہل اور قاسم اعجاز سمرا شامل ہیں۔ جبکہ فنانس سیکرٹری کے لیے بھی تین امیدوار ہیں، حم بن شعیب کمبوہ، فرخ شاہ اور فلک ناز گل۔

لاہور بار الیکشن میں رجسٹرڈ ووٹوں کی تعداد 29,216 ہے جن میں سے 2101 خواتین ووٹرز اور 27,115 مرد ہیں۔