صحت مند پنجاب وژن کے تحت ہیلتھ ریفامز کا آغاز کر دیا گیا ہے ، مریم نواز

لاہور: وزیر اعلیٰ پنجاب مریم نواز شریف نے کہا ہے کہ صحت مند پنجاب وژن کے تحت ہیلتھ ریفارمز کا آغاز کر دیا ہے۔

وزیر اعلیٰ مریم نواز نے صحت کے عالمی دن کے موقع پر پیغام دیتے ہوئے کہا کہ عالمی یوم صحت منانے کا مقصد عوام کو صحت کی اہمیت سے آگاہ کرنا ہے، صحت مند آبادی ہی ایک خوشحال معاشرے کی بنیاد ہے ، انہوں نے کہا کہ ہر فرد کے لئے اپنی صحت کی اہمیت کو سمجھنا بہت ضروری ہے، فرد کی صحت صرف ایک ذاتی معاملہ نہیں بلکہ پوری فیملی پر اثر انداز ہوتی ہے، ہر شہری کے لیے صحت کی سہولیات تک مساوی رسائی یقینی بنانا چاہتے ہیں۔

مریم نواز نے کہا کہ علاج کی سہولتوں کے ساتھ صحت مند طرز زندگی کے شعور کو فروغ دینے کی بھی ضرورت ہے، صحت مند زندگی کا انتخاب کریں، غذائیت سےبھرپورسادہ غذا کھائیں، ہیلتھ ریفارمز اولین ترجیح ہے، عوام بھی صحت مند طرز زندگی اپنائیں ، وزیر اعلیٰ نے کہا کہ پنجاب میں ایئر ایمبولینس سروس بھی شروع کی جائے گی، پنجاب کا پہلا سرکاری محمد نواز شریف کینسر اسپتال لاہور میں تعمیر ہوگا، سرکاری اسپتالوں میں مفت ادویات کی فراہمی شروع، ہوم ڈیلیوری بھی جلد شروع ہوگی۔

انکا کہنا تھا کہ ”صحت مند پنجاب ” وژن کے تحت ہیلتھ ریفارمز کا آغاز کر دیا ہے، پنجاب حکومت صحت عامہ کی سہولتوں کی بہتری کیلئے اربوں روپے کے وسائل فراہم کر رہی ہے۔

انہوں نے کہا کہ سرگودھا میں نوازشریف کارڈیالوجی اسپتال بنایا جا رہا ہے، 2500 بنیادی صحت یونٹس اور 300 دیہی صحت مراکز کی اپگریڈیشن شروع کر دی ہے اور دور دراز علاقوں کے لئے 32 فیلڈ اسپتال کا آغاز کیا جارہا ہے۔