چین نے کورونا ویکسین سائنوویک کو بچوں پر استعمال کی اجازت دیدی

غیر ملکی خبر رساں ادارے کے مطابق  چین نے3  سے 17 سال کی عمر کے لوگوں میں بائیوٹیک کوویڈ 19 ویکسین سائنوویک  کے ہنگامی استعمال کی منظوری دے دی ہے۔

چین نے بڑے پیمانے پر ویکسینیشن شروع کی تھی ، جس نے 3 جون تک 723.5 ملین ویکسین لگا چکا ہے ۔

سائینوویک کمپنی کے مالک کا کہنا ہے کہ  بچوں کو کب ویکسین لگائی جائے گی اس کا فیصلہ چین کی ہیلتھ اتھاریٹیز کریں گیں۔

ابتدائی نتائج کے مطابق ویکسین 3سے 17سال کی عمر کے بچوں  اور نوجوانوں میں  قوتِ مدافعت پیداکرتی ہے اور  ویکسین کے منفی نتائج کم ہیں۔

چند دن قبل   عالمی ادارہ صحت نے ہنگامی استعمال کے لیے چینی ویکسین سائنو ویک کی منظوری دے دی تھی۔  ڈبلیو ایچ او  کیجانب سے  سائنوفارم کے بعد یہ دوسری چینی ویکسین تھی جس کی منظوری دی گئی تھی۔لیکن اس اجازت کو ہنگامی استعمال سے مشروط کیا گیا ہے ۔

  عالمی ادارہ صحت کا کہنا تھا کہ دنیا کو کورونا کی مختلف ویکسینز کی ضرورت ہے اورویکسین بنانے  والے ادارے کوویکس پروگرام میں شرکت کریں۔ اس سے مختلف ممالک، فنڈز، خریداری کرنے والی ایجنسیوں اور برادریوں کو اعتماد ملے گا۔

عالمی ادارہ صحت کے مطابق سائنوویک ویکسین مؤثر، محفوظ اور تیاری کے تمام عالمی معیار پر پورا اترتی ہے اور  یہ 18 سال اوراس سے زائد عمرکے افراد کو لگائی جاسکتی ہے۔   سائنوویک ویکسین پر کئے گئے بعض تجربات اور نتائج سے معلوم ہوا ہے کہ ویکسین لگوانے والے نصف سے زائدافراد کورونا کی ظاہری علامات  سے محفوظ رہے  ، جبکہ 100 فیصد افراد کورونا کی شدید علامات اور ہسپتال میں داخل ہونے سے بچ پائے ہیں ۔سائنوویک کمپنی کے مطابق اب تک دنیا میں اس کی 60 کروڑ خوراکیں دی جاچکی ہیں اور دنیا کے کئی ممالک میں اٹھارہ برس سے زائد عمر کے افراد کے لیے پہلے ہی استعمال کی جارہی ہے۔