محکمہ موسمیات نے موسم شدید گرم رہنے کی پیشگوئی کر دی

محکمہ موسمیات نے ملک بھر میں موسم شدید گرم رہنے کا امکان ظاہر کیا اور ایک دو دن کے وقفے کے بعد درجہ حرارت پھر بڑھنے کی پیش گوئی کر دی۔

محکمہ موسمیات کے مطابق ملک کے بیشتر میدانی علاقوں میں آج بھی گرمی کا راج رہنے کا امکان ہے جبکہ ملک بھر میں 15 جون تک موسم زیادہ گرم رہ سکتا ہے۔

اسلام آباد اور پشاور میں 44، کراچی میں 42 ڈگری سینٹی کی گرمی محسوس کی جائے گی جبکہ لاہور میں درجہ حرارت 45 ڈگری تک جائے گا ۔

اس کے علاوہ نواب شاہ، سکھر اور حیدر آباد سمیت سندھ اور ملتان، بہاولپور ، ڈی جی خان،فیصل آباد، سرگودھا سمیت پنجاب کے متعدد اضلاع میں درجہ حرارت 45 ڈگری سینٹی گریڈ یا اس سے زیادہ رہے گا۔اس دوران ہونے والی آندھی یا بارش کی صورت میں بھی درجہ حرارت میں زیادہ فرق نہیں پڑے گا ۔

 ایک ہفتے تک گرمی کی لپیٹ میں رہنے والے سندھ اضلاع کا درجہ حرارت 2 سے 4 ڈگری تک نیچے آگیا تاہم گرمی کا زور برقرار ہے۔

دوسری جانب گلگت بلتستان، شمالی بلوچستان اور بالائی خیبرپختونخوا میں آج کہیں کہیں بارش متوقع ہے۔

علاوہ ازیں محکمہ موسمیات کے مطابق جون کے دوسرے ہفتے سے پری مون سون کا آغاز ہوگا جس کے سبب بالائی اور شمالی علاقوں میں بارش کا اسپیل بھی درجہ حرارت میں کمی لائے گا۔