پاکستان کرکٹ ٹیم درحقیقت ٹیم ہی نہیں، ہیڈ کوچ نے پول کھول دیا

قومی کرکٹ ٹیم کے ہیڈ کوچ گیری کرسٹن نے قومی ٹیم پر شدید تنقید کرتے ہوئے کہا کہ پاکستانی کرکٹ ٹیم درحقیقت ٹیم ہی نہیں، کسی کو ذمہ داری کا احساس ہی نہیں اور نہ ہی ٹیم میں کوئی اتحاد ہے۔

ملکی اور غیر ملکی مختلف ذرائع ابلاغ نے قومی ٹیم کی خراب کارکردگی پر ٹیم میں عدم یکجہتی کے شکوک کا اظہار کیا تھا، جس پر گیری کرسٹن نے تصدیق کی مہر لگا دی۔

آخری راؤنڈ میچ میں آئرلینڈ سے کافی تگ و دو کے بعد کامیابی حاصل کرنے والی بابر الیون کے ساتھ میٹنگ میں ہیڈ کوچ ٹیم کی ہر شعبے میں ناکامی پر افسردہ نظر آئے۔ 

انہوں نے کہا کہ ٹیم میں ایسے کھلاڑی بھی موجود ہیں جن کو پتہ ہی نہیں کہ کس وقت کون سی شارٹ کھیلنی ہے۔ کھلاڑیوں کے فٹنس معیار پر بھی ہیڈ کوچ نےکہا کہ ٹیم کا فٹنس لیول بھی زیرو ہے ہم دنیا کا مقابلہ نہیں کر سکتے، دنیا کا مقابلہ کرنا ہے تو ہمیں اپنا فٹنس لیول اور سکلز کو بڑھانا ہو گا۔

گیری کرسٹن نے سینئر کھلاڑیوں کے درمیان اختلافات کا حوالہ دیتے ہوئے کہا کہ جب سے ٹیم کو جوائن کیا ہے میں نے ٹیم کو متحد نہیں دیکھا، نہ یہ اتحاد میدان میں نظر آیا اور نہ ہی ڈریسنگ میں اس کی ایک جھلک دیکھنے کو ملی۔

ہیڈ کوچ کے مطابق ایسی صورتحال بطور کوچ میں نے کہیں نہیں دیکھی، انہوں نے کھلاڑیوں کو خبردار کیا کہ اگر کھلاڑی ایک ٹیم نہ بنے اور اپنی فٹنس اور اسکلز پر توجہ نہیں دی تو وہ ٹیم کا حصہ نہیں ہوں گے۔

واضح رہے کہ گیری کرسٹن کی زیر تربیت گرین شرٹس نے ٹی 20 ورلڈ کپ میں مایوس کن کارکردگی کا مظاہرہ کیا تھا اور ٹیم سُپر 8 مرحلے تک رسائی میں بھی ناکام رہی تھی۔