مشہور ماڈل متھیراچاہت فتح علی خان پر پھٹ پڑیں،مگر کیوں؟

پاکستان کی نامور ماڈل اور ٹی وی میزبان متھیرا نے بغیر اجازت وڈیو بنانے اور اسے شیئر کرنے پر سوشل میڈیا اسٹار چاہت فتح علی خان پر سخت تنقید کی ہے۔
متھیرانے کامیڈی سنگر چاہت فتح علی خان پر سخت الفاظ میں تنقید کرتے ہوئے کہا کہ ان کی بے باکی کو غلط انداز میں لینا یا ان کی ذاتی حدوں کو پار کرنا ناقابل قبول ہے۔
انہوںنے وضاحت کی کہ یہ وائرل وڈیو ان کے شو کے کیمروں سے نہیں بلکہ چاہت فتح علی خان کی جانب سے عجیب اینگل سے بنائی گئی ہے،ان کا کہنا تھا کہ وہ مہمانوں کو ہمیشہ عزت دیتی ہیں لیکن چاہت نے ان کے اعتماد کو ٹھیس پہنچائی۔
میزبان و ماڈل نے مزید کہا کہ ، "بولڈ ہونے کا مطلب یہ نہیں کہ کوئی بھی مجھے گلے لگائے یا پشت پر ہاتھ رکھے، یہ سب حد سے تجاوز ہے، اور ایک باشعور انسان ایسی حرکت نہیں کرے گا۔"
انہوںنے مزید کہا کہ چاہت فتح علی خان نے وڈیو ہٹانے کی یقین دہانی کرائی تھی لیکن ابھی تک نہ وڈیو ہٹائی گئی ہے اور نہ معافی مانگی گئی، جس پر انہوں نے مایوسی کا اظہار کرتے ہوئے کہا کہ لوگ شہرت کے لیے ایسی حرکات کرتے ہیں، جو کہ بہت افسوسناک ہے۔
میزبان نے اپنے مداحوں کو متنبہ کیا کہ وہ انہیں نہ گلے لگانے کی کوشش کریں اور نہ ہی ہاتھ ملانے کی، کیونکہ ان کی ذاتی حدود ہیں جن کا احترام ضروری ہے۔
واضح رہے کہ کچھ روز قبل چاہت فتح علی خان نے متھیرا کے شو میں مہمان کی حثیت سے شرکت کی تھی، پروگرام کی ایک ویڈیو چاہت فتح علی خان نے اپنے انسٹاگرام پر شیئر کی جو وائرل ہوگئی۔
 ویڈیو میں چاہت فتح کی جانب سے  متھیرا کو گلے لگانے کی کوشش اور ان سے ہاتھ ملاتے ہوئے دیکھا جاسکتا ہے،ویڈیو میں دیکھا جاسکتا ہے کہ چاہت فتح علی خان کی حرکات پر متھیرا غیر آرام دہ  ہیں اور خود کو ان سے دور کرنے کی کوشش کررہی ہیں۔