وفاق کادریائے سندھ سے6 نئی کینالز بنانے کا منصوبہ ناقابل قبول ہے،مراد علی شاہ

کراچی : وزیراعلیٰ سندھ سید مراد علی شاہ کا کہنا ہے کہ وفاق کا دریائے سندھ سے 6نئی کینالز بنانے کا منصوبہ ناقابل قبول ہے، سندھ کا پانی کسی کو نہیں دیں گے۔
سندھ اسمبلی میں دریائے سندھ سے 6 نئی نہریں نکالنے کے خلاف وزیراعلیٰ سندھ مراد علی شاہ نے قرارداد پیش کر دی۔
قرارداد میں کہا گیا کہ ایوان دریائے سندھ سے نئی نہریں نکالنے کے فیصلے کو مسترد کرتا ہے، سند ھ کے آئینی حقوق کی خلاف ورزی کی جا رہی ہے۔
وزیر اعلی مرادعلی شاہ نے کہا کہ سندھ کے آئینی حقوق کی خلاف ورزی کی جارہی ہے ۔ وفاق کا نئی چھ کینالز بنانے کا منصوبہ ناقابل قبول ہے ، نئی نہروں کی تعمیر غیر قانونی ہے ۔ سندھ حکومت عوام کے ساتھ مل کراحتجاج کرے گی۔
مراد علی شاہ کا مزید کہنا تھا کہ متنازعہ نہروں کی وجہ سے زراعت کوبھی نقصان ہوگا، ایسا منصوبہ منظور نہیں کریں گے جس سے پانی کی کمی ہو۔
دوران اجلاس میں جام خان شورو نے اظہار خیال کرتے ہوئے کہا کہ سندھ کے پانی پر ڈاکہ ڈالنے کی کوشش کی گئی، پیپلز پارٹی نے ہمیشہ پانی کی منصفانہ تقسیم کی بات کی، پانی کی غیر منصفانہ تقسیم قابل قبول نہیں۔
اس سے قبل صوبائی وزیرتوانائی سندھ ناصرحسین شاہ نے کہا کہ ایس آئی ایف سی ملک کےلیے اچھا کام کررہی ہے، ایس آئی ایف سی معاشی حالت کی بہتری کےلیے کام کررہی ہے مگر آیس آئی ایف سی کو اختیار نہیں کہ وہ متنازعہ نہروں کامنصوبہ شروع کرسکے۔ کسی منصوبے پراعتراض ہوتو اس کو دور کیا جاتاہے، ملک کی بہتری کےلیے اگر منصوبہ ہوگا توکرینگے۔