انسٹاگرام پر نابالغ افراد کی لائیو اسٹریمنگ پر پابندی عائد ، والدین کی اجازت درکار

سوشل میڈیا انٹرنیٹ کمپنی میٹا نے سوشل شیئرنگ ایپلی کیشن انسٹاگرام پر نابالغ افراد کی لائیو اسٹریمنگ پر پابندی عائد کردی، تاہم ایسے افراد والدین کی اجازت کے بعد براہ راست نشریات دکھا سکیں گے۔

برطانوی اخبار ’دی گارجین‘ کے مطابق میٹا کی جانب سے متعدد ممالک میں سیفٹی قوانین پر تنقید کے بعد نئے اقدامات کا اعلان کیا اور فوری طور پر انسٹاگرام پر 16 سال تک کی عمر کے افراد کی لائیو اسٹریمنگ پر پابندی عائد کردی۔

ساتھ ہی میٹا نے کم عمر بچوں کے سیٹنگ اکاؤنٹ پرائیویسی کو فیس بک اور میسینجر تک بھی بڑھا دیا، اب ایسے بچوں کو انسٹاگرام اور میسینجر پر موصول ہونے والی نازیبا اور خطرناک ویڈیوز اور تصاویر سے بلرنگ ہٹانے کے لیے بھی والدین کی رضامندی اور اجازت درکار ہوگی۔

میٹا گزشتہ چند سال سے کم عمر بچوں کے تحفظ کے لیے متعدد سیکیورٹی فیچرز اور سیٹنگز متعارف کرا چکا ہے اور اس کی جانب سے 16 سال سے کم عمر بچوں اور نو عمر افراد کی حفاظت اور ذہنی صحت کے لیے مسلسل فیچرز متعارف کرائے جا رہے ہیں۔

اب 16 سال کی عمر کے افراد کو اپنے انسٹاگرام پر لائیو اسٹریمنگ کے لیے والدین کی اجازت درکار ہوگی اور والدین ’ٹین اکاؤنٹس سسٹم‘ کے ذریعے بچوں کو اجازت دے سکیں گے۔

دنیا بھر میں زیادہ تر کم عمر صارفین ٹک ٹاک اور انسٹاگرام جیسی ایپلی کیشنز استعمال کرتے ہیں اور ایسے افراد ایسے پلیٹ فارمز پر نامناسب اور خطرناک مواد کو بھی تلاش کرتے دکھائی دیتے ہیں، جس پر اب کمپنیاں سخت فیچرز متعارف کرانے لگی ہیں۔

میٹا سمیت دیگر پلیٹ فارمز جیسا کہ ٹک ٹاک پر بھی کم عمر افراد کے لیے حفاظتی اور سیکورٹی ٹولز متعارف کرائے جاتے رہے ہیں۔