وزیر اعلی پنجاب مریم نواز کا سروسز اسپتال کا اچانک دورہ

وزیراعلیٰ پنجاب مریم نواز آفس سے واپسی پر اچانک سروسز ہسپتال پہنچ گئیں، جہاں انہوں نے مریضوں کو دستیاب سہولتوں کی فراہمی کا جائزہ لیا،وزیراعلیٰ نےسروسز ہسپتال کے انتظامات پراطمینان کا  اظہار کیا۔ 

مختصر دورے میں وزیراعلیٰ مریم نواز  نےسروسز ہسپتال کے ایمرجنسی وارڈ کا تفصیلی دورہ کیا،ایمرجنسی وارڈ میں مریضوں کے علاج کا مشاہدہ کیااور تیمارداروں سے ادویات کی دستیابی کے بارے میں دریافت کیا جبکہ زیر علاج مریضوں سے بات چیت کی ،انہوں  نے خواتین سے مصافحہ کیا اور حال چال دریافت کیا۔

مریم نواز نے اس دوران گفتگو کرتے ہوئے کہا کہ جناح اور میو ہسپتال میں ایکشن  لینے سے ہسپتالوں کے حالات میں بہت بہتری آئی،جناح ہسپتال میں ادویات ڈبوں میں بند پڑی تھی لیکن مریضوں کو نہیں مل رہی تھیں، فوری ایکشن کی وجہ سے مریضوں کو ریلیف ملا،سروسز ہسپتال سے خوش ہوکر جارہی ہوں، کسی نے نہیں کہا کہ ادویات باہر سے لانی پڑی، مریضوں کو انتظار بھی نہیں کرنا پڑتا،ہسپتالوں میں اناونسمنٹ ہورہی ہیں حکومت مفت میڈیسن دے رہی ہے اگر آپ سے کوئی آپ سے پیسے لے تو آپ نے نہیں دینے۔ 

مریم نواز کا مزید کہنا تھا کہ ادویات فراہم کرنا حکومت کا کام ہے، مریضوں نے میڈیسن بازار سے نہیں لینی،ہسپتالوں میں کیبنٹ رکھوادیئے ہیں، مریضوں کو نظر آتا ہے کہ جو ادویات چاہیے وہ یہاں دستیاب ہیں، میرے کام پنجاب کے عوام کے مفاد میں بہترین فیصلے کرنا ہے، اس سے مجھے کوئی نہیں روک سکتا۔  

ان کا کہنا تھا کہ عوام کے لیے ہسپتالوں کو چیک کرنا وزیراعلیٰ کی ذمہ داری ہے، وزیراعلیٰ کا م نہیں کرے گا تو نیچے والے لوگ کیسے کام کریں گے،فیلڈ میں جاکر حالات کا جائزہ لینا وزیراعلیٰ کا کام ہے، آفس میں کرسی پر نہیں بیٹھ سکتی،وزیراعلی کا کام ٹانگ پر ٹانگ رکھ کر بیٹھے رہنا نہیں۔