کراچی میں بڑھتا ہوا کورونا وائرس 4 افراد کی زندگیاں نگل گیا

کراچی:صوبائی دارالحکومت کراچی میں ایک دفعہ پھر کورونا وائرس نے سر اٹھا نا شروع کر دیا،صوبائی محکمہ صحت نے کراچی میں کورونا وائرس سے 4 اموات کی تصدیق کردی۔
 نجی ہسپتال کے حکام کے مطابق متاثرہ افراد کی عمریں 60 سال سے زائد تھیں۔
اس حوالے سے ماہرِ متعدی امراض ڈاکٹر فیصل محمود کا کہنا ہے کہ گزشتہ 2 سے 3 ہفتوں کے دوران کورونا کے کیسز میں نمایاں اضافہ دیکھا گیا ہے۔
ان کا کہنا تھا کہ متاثرہ افراد میں کورونا کی علامات وہی ہیں، جو گزشتہ برسوں میں سامنے آتی رہی ہیں،جن  میں کھانسی، نزلہ، بخار اور جسم میں درد کی نمایاں علامات شامل ہیں،
 انہوںنے عوام سے اپیل کرتے ہوئے احتیاطی تدابیر اپنانےاور رش والی جگہوں پر جاتے وقت ماسک استعمال کرنے کی تلقین کی ہے۔
کورونا سے بچوں اور بزرگوں کو بالخصوص محفوظ رکھنے کے لیے احتیاطی تدابیر اپنانے کی ہدایت بھی کی گئی ہے۔
خیال رہے کہ دسمبر2019 میں چین کے شہر ووہان سے پھیلنے والا کورونا وائرس اپریل 2020  تک دنیا کے تقریباً 185 ممالک تک پھیل گیا تھا، بعد ازاں اس وائرس سے دنیا بھر میں کروڑوں افراد متاثر اور ایک لاکھ سے زیادہ ہلاک ہوئے تھے۔