عید پر تباہی کا بڑا منصوبہ ناکام، سی ٹی ڈی نے "را" کے تین دہشت گرد گرفتار کر لیے

لاہور: کاؤنٹر ٹیررازم ڈیپارٹمنٹ (سی ٹی ڈی) پنجاب نے انٹیلیجنس بیسڈ کارروائی کرتے ہوئے بھارت کی خفیہ ایجنسی "را" سے تعلق رکھنے والے تین خطرناک دہشت گردوں کو جھنگ روڈ، پٹھان کالونی سے گرفتار کر لیا۔

گرفتار دہشت گردوں کا تعلق جنوبی پنجاب کے مختلف علاقوں سے ہے، جن میں اعظم منچن آباد، امجد پاکپتن اور منظور بہاول نگر شامل ہیں۔

ترجمان سی ٹی ڈی کے مطابق دہشت گرد عید کے موقع پر لاہور، بہاولپور، بہاول نگر اور پاکپتن میں اہم مقامات کو نشانہ بنانا چاہتے تھے۔ دہشت گردوں سے بھاری مقدار میں اسلحہ، دھماکہ خیز مواد، ڈیٹونیٹرز اور نقشے برآمد ہوئے ہیں۔

ترجمان کے مطابق ملزمان فتنہ الخوارج اور بھارتی ایجنسی را کے لیے کام کرتے ہیں اور متعدد بار غیر قانونی طور پر سرحد پار کر کے سری نگر اور راجستھان میں "را" کے ایجنٹوں سے ملاقاتیں کر چکے ہیں۔

تحقیقات سے معلوم ہوا ہے کہ دہشت گرد واٹس ایپ کے ذریعے بھارت کو حساس مقامات کے نقشے ارسال کرتے رہے۔ سی ٹی ڈی فیصل آباد نے مقدمہ درج کر کے مزید تفتیش شروع کر دی ہے۔ پنجاب بڑے سانحے سے بچ گیا