این ڈی ایم اے نے 11 سے 17 جولائی تک بارشوں اور ممکنہ سیلاب کا الرٹ جاری کر دیا

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے 11 سے 17 جولائی تک بارشوں اور ممکنہ سیلاب کے خطرے پر الرٹ جاری کر دیا۔

این ڈی ایم اے کی جانب سے جاری کر دہ الرٹ کے مطابق پنجاب کے اضلاع بشمول جہلم، چکوال، سرگودھا، لاہور، سیالکوٹ، گوجرانوالہ، گجرات، فیصل آباد اور نارروال میں شدید بارش کا امکان ہے

اس کے علاوہ ڈی جی خان، راجن پور اور رحیم یار خان میں پہاڑی ندی نالوں میں پانی کے بہاؤ میں اضافہ متوقع ہے۔ 

الرٹ میں مزید بتایا گیا کہ پیر پنجال رینج سے نکلنے والے نالوں میں برساتی پانی کے بہاؤ اضافے کے باعث شمال مشرقی پنجاب کے علاقوں میں سیلابی صورتحال کا خدشہ ہے۔

اسی طرح خیبر پختونخوا میں دیر، سوات، مانسہرہ، کوہستان، نوشہرہ، پشاور، مردان، بونیر، وزیرستان و دیگر علاقوں میں تیز بارشوں کے باعث اچانک سیلابی صورتحال بن سکتی ہے،جبکہ بارشونں سے دریائے کابل، دریائے سوات، پنجکورہ اور کلپانی نالے میں پانی کی سطح بلند ہونے کا خدشہ ہے۔

دوسری جانب نوشہرہ کے مقام پر دریائے کابل میں سیلابی صورتحال جب کہ بلوچستان کے علاقوں زیارت، کوئٹہ، مستونگ، قلات، خضدار، لورالائی، موسیٰ خیل، ڈیرہ بگٹی و دیگر میں مقامی ندی نالوں میں طغیانی کا امکان ہے،جبکہ بارشوں کے باعث پہاڑی علاقوں میں لینڈ سلائیڈنگ اور نشیبی علاقوں میں سیلابی صورتحال متوقع ہے۔

الرٹ میں این ڈی ایم اے نے ہدایت کی ہے کہ عوام ندی نالوں میں بہاؤ کے اضافے کے پیش نظر محتاط رہیں اور غیر ضروری سفر سے اجتناب کریں۔

دوسری جانب مقامی انتظامیہ اور متعلقہ ادارے ممکنہ لینڈ سلائیڈنگ اور سیلابی صورتحال سے متاثرہ سڑکوں کی فوری بحالی کے لئے مشینری تیار رکھیں۔

این ڈی ایم اے نے تمام متعلقہ اداروں کو ہدایات جاری کی ہیں کہ کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنایا جائے۔

اؒلرٹ میں عوام سے گزارش کی ہے کہ موسم اور ممکنہ خطرات کے حوالے سے آگاہی کے لیے پاک این ڈی ایم اے ڈیزاسٹر الرٹ ایپ سے راہنمائی لیں۔