ایشیا کپ ہاکی بھارت میں ہو گا یا کہیں اور؟سابق پاکستانی اولمپیئنز کا بڑا مطالبہ سامنے آ گیا

لاہور: پاکستان کے سابق اولمپیئنز کی طرف سے ہاکی ایشیا کپ ٹورنامنٹ بھارت سے کسی دوسرے ملک منتقل کرنے کا مطالبہ کردیا گیا۔

لاس اینجلس اولمپکس1984کے گولڈ میڈلسٹ توقیر ڈار کا کہنا ہے کہ پاکستان اور بھارت اس وقت حالت جنگ میں ہیں ، بھارت نے ہمارا پانی بند کیا ہوا ہے ایسی صورت حال میں ہم یہ کیسے سوچ سکتے ہیں کہ ہمارے کھلاڑی وہاں جائیں اور کھیلیں۔

انہوں نے کہا کہ اگر کھلاڑی وہاں چلے بھی جائیں تو جو ماحول ان کو دیا جائے گا وہ قید کی مانند ہو گا اور ایسی قید میں کھلاڑی کیا پرفارمنس دیں گے۔

سابق اولمپیئن کا مزید کہنا تھا کہ ایشیا کپ کو نیوٹرل وینیو پر منتقل کرنا ہو گا، اگر ٹورنامنٹ منتقل کرنا ممکن نہیں تو پاکستان کے میچز نیوٹرل وینیو پر کروائے جائیں۔

دوسری جانب سابق اولمپیئن خواجہ جنید کا کہنا ہے کہ بھارت جانے کے لیے حکومت جو فیصلہ کرے گی ہمیں اس کے مطابق چلنا چاہیے، بھارت کے ساتھ اس وقت جنگ کی صورتحال ہے ، جو حالات اب ہیں وہ پہلے کبھی نہیں تھے۔

انہوں نے کہا کہ ایشیا کپ کے لیے نیوٹرل وینیو ہی ترجیح ہونا چاہیے، پی سی بی چیئر مین محسن نقوی کی طرح سخت موقف اپنانا چاہیے۔

ان کا مزید کہنا تھا کہ ہاکی فیڈریشن کی جانب سے نیوٹرل وینیو کا مطالبہ ہونا چاہیے، اگرنیوٹرل وینیو کا مطالبہ نہیں مانا جاتا تو ایونٹ کوبھارت سے کسی دوسرے ملک منتقل کیا جانا چاہیے۔