سری لنکا کے سابق صدر رانیل وکرما سنگھے ریاستی فنڈز کے غلط استعمال پر گرفتار

کولمبو: سری لنکا کے سابق صدر رانیل وکرما سنگھے کو ریاستی فنڈز کے غلط استعمال کے الزام میں گرفتار کر لیا گیا ہے۔ 

غیر ملکی خبر رساں ادارے ’رائٹرز‘ کے مطابق انہیں جمعے کے روز کولمبو میں محکمہ سی آئی ڈی نے اس وقت حراست میں لیا جب وہ لندن دورے سے متعلق بیان ریکارڈ کرانے دفتر پہنچے۔

تفصیلات کے مطابق 76 سالہ وکرمہ سنگھےپر الزام ہے کہ انہوں نے لندن کا دورہ اپنی اہلیہ کی گریجوایشن تقریب میں شرکت کے لیے سرکاری اخراجات پر کیا،تاہم پولیس ترجمان نے فی الحال گرفتاری کی تصدیق نہیں کی جبکہ وکرمہ سنگھے کے دفتر سے بھی اس حوالے سے کوئی با ضابطہ اعلان سامنے نہیں آیا۔ 

خیال رہے کہ رانیل و کرما سنگھے سری لنکا کی سیاست کا ایک بڑا نام ہیں، وہ چھ بار وزیر اعظم رہ چکے ہیں اور 2022 میں ملک کے شدید مالی بحران کے دوران صدر منتخب ہوئے۔

 اس وقت ملک میں بدترین معاشی صورتحال کے باعث عوامی احتجاج نے شدت اختیار کر لی تھی جس کے نتیجے میں اُس وقت کے صدر گوٹابایا راجا پکشے کو ملک بدر ہونا پڑا اور بالآخر انہیں استعفیٰ دینا پڑا۔

 وکرمہ سنگھےیو نائیٹڈ نیشنل پارٹی UNP    کے سربراہ ہیں، وہ ایک نمایاں سیاسی اور کاروباری گھرانے میں پیدا ہوئے اور 1978 میں اپنے چچا، اُس وقت کے صدر جونیئس جے وردھنے کی کابینہ میں 29 سال کی عمر میں سب سے کم عمر وزیر کے طور پر شامل ہوئے۔

 سنہ 1994 میں پارٹی کے کئی سینئر رہنماؤں کے قتل کے بعد انہوں نے یونائیٹڈ نیشنل پارٹی کی قیادت سنبھالی۔