یو این اجلاس سے قبل ممکنہ سائبر حملے کی کوشش ناکام، نیویارک میں بڑی کارروائی

نیو یارک: امریکی سیکریٹ سروس کا کہنا ہے کہ اس نے ایک لاکھ سے زائد سم کارڈز پر مشتمل ایک ایسا نیٹ ورک ناکارہ بنایا ہے، جو اقوام متحدہ کی جنرل اسمبلی کے اجلاس سے قبل نیو یارک کے ٹیلی کمیونیکیشن نظام کو متاثر کر سکتا تھا۔

ایجنسی کے مطابق یہ سم کارڈز ممکنہ طور پر نہ صرف دھمکی آمیز فون کالز کے لیے استعمال کیے جا سکتے تھے بلکہ ان کا استعمال ٹیلی کمیونیکیشن انفراسٹرکچر پر حملوں میں بھی ہو سکتا تھا۔ ان حملوں میں موبائل ٹاورز کو بند کرنا، سروسز کو متاثر کرنا اور جرائم پیشہ افراد کو محفوظ مواصلاتی ذرائع فراہم کرنا شامل ہو سکتا تھا۔

یاد رہے کہ اقوام متحدہ کی جنرل اسمبلی کا سالانہ اجلاس منگل کو نیو یارک میں شروع ہوا، جہاں امریکی صدر ڈونلڈ ٹرمپ نے بھی خطاب کیا۔

سیکریٹ سروس کے مطابق ضبط کیے گئے سم کارڈز اقوام متحدہ کے اجلاس کی جگہ سے تقریباً 35 میل (56 کلومیٹر) کے اندر موجود تھے، جس کے باعث فوری کارروائی ناگزیر سمجھی گئی تاکہ شہر کے کمیونیکیشن سسٹم کو کسی بڑے خطرے سے بچایا جا سکے۔

ایجنسی نے مزید بتایا کہ ان سم کارڈز کی تفتیش جاری ہے، اور ابتدائی معلومات کے مطابق ان کے ذریعے ایسے افراد سے رابطے کیے جا رہے تھے جو پہلے سے وفاقی اداروں کی نظر میں ہیں۔

سیکریٹ سروس کی جانب سے جاری کردہ تصاویر میں مختلف ٹیلی کمیونیکیشن ڈیوائسز کے ساتھ جڑے ہوئے متعدد سم کارڈز کو بھی دکھایا گیا ہے۔