گیارہویں جماعت میں خوبصورتی کی وجہ سے ڈرامے میں کام کی پیش کش ہوئی ، نوشین شاہ کا انکشاف

معروف ماڈل و اداکارہ نوشین شاہ نے انکشاف کیا ہے کہ انہیں پہلی بار ڈرامے میں کام کی پیش کش کالج کے دنوں میں ملی، جب وہ گیارہویں جماعت کی طالبہ تھیں، اور ان کی خوبصورتی دیکھ کر پروڈکشن ٹیم نے انہیں کاسٹ کیا۔

نوشین شاہ حال ہی میں ایک ٹی وی پروگرام میں شریک ہوئیں، جہاں انہوں نے اپنی زندگی، کیریئر اور ابتدائی جدوجہد سے متعلق دلچسپ واقعات پر روشنی ڈالی۔ انہوں نے بتایا کہ ان کی پیدائش کراچی میں ہوئی، تاہم ان کے والدین کا تعلق خیبرپختونخوا سے ہے۔

اداکارہ کے مطابق ان کے والد پیشے کے لحاظ سے ٹرانسپورٹر ہیں، مگر انہوں نے اپنے تمام بچوں کو اپنی مرضی کا شعبہ اختیار کرنے کی آزادی دی۔

نوشین شاہ نے بتایا کہ ایک دن ان کے کالج میں ڈرامے کی پروڈکشن ٹیم نئے چہروں کی تلاش میں آئی، اور ان پر نظر پڑنے کے بعد انہیں پرنسپل کے دفتر میں بلا کر کردار کی پیش کش کی گئی۔ ٹیم نے انہیں مشورہ دیا کہ پہلے اپنے والدین سے اجازت لیں، لیکن انہوں نے بغیر اطلاع دیے اگلے روز سہیلی سے کپڑے لے کر شوٹنگ کے لیے پہنچ گئیں۔

ان کے مطابق کردار مختصر تھا، مگر انہیں تین ہزار روپے معاوضے کے طور پر دیے گئے۔

اداکارہ نے بتایا کہ جب ڈراما ٹی وی پر نشر ہوا، تو ان کی والدہ نے سخت ناراضی کا اظہار کیا اور انہیں ڈانٹا، جبکہ والد نے ان کے جھوٹ بولنے پر ناراضگی ظاہر کی، نہ کہ اداکاری پر۔ ان کے والد نے انہیں نصیحت کی کہ جو کام کرنا ہے کریں، مگر جھوٹ نہ بولیں اور اچھے کاموں کا انتخاب کریں۔

نوشین شاہ نے یہ بھی بتایا کہ یہ واقعہ تقریباً 20 سال قبل پیش آیا، اور اس کے بعد وہ متعدد کامیاب اور معیاری ڈراموں میں اداکاری کر چکی ہیں۔