دبئی میں جدید ٹیکنالوجی اور روبوٹس سے لیس دنیا کا سب سے شاندار اسکول،تعمیر پر کتنی لاگت آئی؟

دبئی کے جیمز اسکول آف ریسرچ اینڈ انوویشن کو جدید ٹیکنالوجی، روبوٹکس اور تعلیم کے معیار کی بدولت دنیا کے بہترین اسکولوں میں شمار کیا جا رہا ہے۔

میڈیا رپورٹ کے مطابق اس اسکول میں طلباء کو مصنوعی ذہانت کی لیبز، روبوٹکس، ای اسپورٹس، پرفارمنگ آرٹس اور جسمانی کھیلوں کی جدید سہولیات فراہم کی گئی ہیں تاکہ وہ مستقبل کے رہنما بن سکیں، اسکول میں تعلیم دینے والے اساتذہ اور رہنماؤں میں صنعتی اور علمی ماہرین شامل ہیں تاکہ طلباء کو عملی اور تخلیقی علوم میں مہارت دی جا سکے۔

اسکول کا نصاب برطانوی نظام تعلیم پر مبنی ہے، تاہم اس میں جدید تحقیق اور تخلیق پر مبنی ماڈل بھی شامل کیا گیا ہے، اسکول کی سالانہ فیس تقریباً ایک لاکھ سولہ ہزار درہم سے شروع ہوتی ہے اور اعلیٰ کلاسز کے لیے دو لاکھ چھ ہزار درہم تک جا سکتی ہے۔

رپورٹس کے مطابق یہ اسکول 47,600  مربع میٹر پر محیط ہے جس میں ایک بلند فٹبال میدان، اولمپک سائز سوئمنگ پول، باسکٹ بال کورٹ، روبوٹکس لیبز، ڈیزائن اسٹوڈیوز اور تحقیقاتی مراکز موجود ہیں، اور کیمپس میں شمسی توانائی اور جدید پانی کی بچت کے نظام نصب کیے گئے ہیں،جبکہ اس کی تعمیر پر تقریباً 100 ملین ڈالر کی لاگت آئی ہے۔

اس حوالے سے جیمز ایجوکیشن کے بانی اور چیئرمین نے کہا ہے کہ یہ اسکول آنے والے کل کے کلاس روم کی بہترین مثال ہے، جہاں ہر طالب علم کو تخلیق، قیادت اور تحقیق کے مواقع میسر ہوں گے۔