ای سی سی کی اشیائے ضروریہ کی قیمتوں میں اضافے کی منظوری

وزیر خزانہ حفیظ شیخ کی زیر صدارت اقتصادی رابطہ کمیٹی(ای سی سی) کا اجلاس ہوا جس میں یوٹیلیٹی سٹورز پر سبسڈائز اشیاء کی قیمتوں پر نظرثانی کی سمری کا جائزہ لیا گیا۔اجلاس میں یوٹیلیٹی اسٹورز پر چینی، آٹا ، گھی کی قیمتوں پر نظرثانی سے متعلق مختلف تجاویز پر بریفنگ دی گئی اور  ای سی سی نے اشیائے ضروریہ کی قیمتوں میں محدود سطح تک اضافے کی منظوری دے دی جبکہ ای سی سی نے اوشئین شپنگ سروسز کو 5.8 لاکھ ڈالر فراہم کرنے کی منظوری بھی دے دی ،جرمن کمپنی کو اسٹیل ملز کے لئے کوئلے کی فراہمی کے بقایاجات کی مد میں ادائیگی کی جائے گی۔

اقتصادی رابطہ کمیٹی(ای سی سی) اجلاس میں آئی ٹی اور ٹیلی کام سیکٹر میں ٹیکسوں کے مسائل کے حل کیلئے قائم ذیلی کمیٹی کی سفارشات منظور کر لی گئیں جبکہ اجلاس میں وزارت توانائی کی آف شور سپلائی کنٹریکٹرز کو ادائیگیوں پر ٹیکس عائد کرنے کی سمری پر غور کیا گیا اورسیکرٹری قانون کی سربراہی میں تجاویز کی تیاری کیلئے سب کمیٹی قائم کردی گئی۔

اقتصادی رابطہ کمیٹی(ای سی سی) اجلاس میں بجلی بلوں پر 10 پیسے فی یونٹ نیلم جہلم سرچارج ختم کرنے کی بھی منظوری دےدی گئی جبکہ زرعی شعبے کیلئے کورونا وباء کے تناظر میں وزیراعظم ریلیف پیکیج کی سبسڈی کی تقسیم بارے سمری بھی منظور کر لی گئی، اس کے ساتھ ساتھ ای سی سی نے نیشنل الیکٹرانکس کمپلیکس منصوبے کیلئے ساورن گارنٹی کی منظوری بھی دے دی۔

اقتصادی رابطہ کمیٹی(ای سی سی) اجلاس میں سپیشل کمیونیکیشن آرگنائزیشن کیلئے 55 کروڑ روپے کی سپلیمنٹری گرانٹ،احساس پروگرام کی میڈیا مہم کے واجبات کی ادائیگی کیلئے وزارت اطلاعات کو 10.9 کروڑ کی ادائیگی اور سپیشل ٹیکنالوجی زونز کیلئے 20 کروڑ کے اجراء کی منظوری بھی دے  دی گئی۔