کسٹم انٹیلی جنس کی بڑی کارروائی،پورٹ قاسم سے بھارت اور اسرائیل کی مصنوعات کا کھیپ ضبط

تفصیلات کے مطابق  کسٹم انٹیلی جنس نے  بڑی کارروائی  کرتے ہوئے  پورٹ قاسم سے بھارت اور اسرائیل کی مصنوعات کا کنسائیمنٹ ضبط ،مقدمہ درج کرلیا گیا۔ مقدمے کے اندراج کے باوجود درآمد کنندہ اور سہولت کار کسٹم افسران کو گرفتار نہ کیا جاسکا۔

قانون کے مطابق بھارتی اور اسرائیلی مصنوعات کی درآمد پر پابندی ہے ، بھارتی اور اسرائیلی مصنوعات کا کنٹینر عمان کی پورٹ سلا لہ سے منگوایا گیا تھا، کسٹم انٹیلی جنس نے اطلاع پر کنسائیمنٹ کو آن لائن بلاک کردیا تھا، بلاک ہونے کی باوجود پورٹ قاسم پر تعینات کسٹم افسران نے کنسائیمنٹ کو کلئیر کردیا تھا ۔

کسٹم انٹیلی جنس نے بروقت کارروائی کرکے کنٹینر کو پورٹ سے باہر جانے سے روکا ، مقدمے میں میسرز زمانہ کو انٹرنیشنل کے مالک حاتم بھائیو کو نامزد کیا گیا ہے، بھارتی اور اسرائیلی اشیا کے کنسائمنٹ کا وزن بھی کم ظاہر کرکے قومی خزانے کو اسی لاکھ سے زائد کی ڈیوٹی اور ٹیکسز کی مد میں نقصان پہنچانے کی کوشش کی گئی ، مصنوعات میں کاسمیٹکس اور اسرائیلی کمپنی کا آئل بھی شامل ہے۔