پہلی بار انسان کے سینے میں خنزیر کا دل لگا دیا گیا

یونیورسٹی آف میری لینڈ میڈیکل اسکول کے مطابق ایک مریض میں کامیابی سے جینیاتی طور پر تبدیل شدہ خنزیر کا دل لگایا گیا ہے ۔  امریکا سے تعلق رکھنے والے 57 سالہ ڈیوڈ بینیٹ دنیا کے پہلے انسان بن گئے ہیں جن میں جینیاتی طور پر تبدیل شدہ خنزیر کا دل لگایا گیا ہے۔

ابتدائی تجربات میں بندر کا دل لگایا جاتا تھا تاہم بندر کا دل پیوند کاری میں مفید ثابت نہ ہوا، جبکہ خنزیر پر تجربہ مفید رہا ہے ۔ 

امریکا میں یہ کارنامہ کراچی سے تعلق رکھنے والے ڈاکٹر منصور محی الدین نے انجام دیا جو ڈاؤ یونیورسٹی آف ہیلتھ سائنسز سے گریجویٹ ہیں۔

اس پیوند کاری کو مریض  کی زندگی بچانے کی آخری امید سمجھا جاتا تھا، حالانکہ ابھی تک یہ واضح نہیں ہے کہ ان کے زندہ رہنے کے طویل مدتی امکانات کیا ہیں۔

بی بی سی کے مطابق مریض نے اپنے آپریشن سے پہلے گفتگو میں کہا تھا کہ انہیں پتا ہے یہ اندھیرے میں تیر چلانے کے مترادف ہے مگر ان کے لیے یہ آخری انتخاب تھا  کہ موت کو قبول کریں یا پھر ٹرانسپلانٹ کرائیں ۔

یونیورسٹی آف میری لینڈ میڈیکل سنٹر  ٹرانسپلانٹ کرنے والی میڈیکل ٹیم کے لیے یہ برسوں کی تحقیق کا نچوڑ ہے اور اگر یہ کامیاب رہتا ہے تو دنیا بھر کی زندگیوں کو بدل سکتا ہے۔

یونیورسٹی آف میری لینڈ سکول آف میڈیسن نے ایک پریس  ریلیز میں کہا کہ سرجن بارٹلی گریفتھ نے کہا کہ  یہ سرجری دنیا  میں "اعضاء کی قلت کو دور  کرنے کے ایک قدم کے قریب" لے آئے گی ۔ اس کا مطلب ہے کہ امریکہ میں ایک دن میں 17 افراد ٹرانسپلانٹ کے انتظار میں مر جاتے ہیں ، جن میں مبینہ طور پر 100,000 سے زیادہ افراد انتظار کی فہرست میں شامل ہیں۔