دوسروں کی جگہ طویل  قطاروں میں کھڑے ہوکر ہزاروں روپے کمانے والا شخص

کیا آپ کو بھی چند منٹ قطار میں کھڑے ہوکر اپنی چیزوں کا انتظار کرنا بورنگ لگتا ہے؟ لیکن اگر ہم آپ کو بتائیں کہ برطانیہ کا ایک شخص اس کام کو اپنا کاروبار بنا کر روزانہ ہزاروں کما رہا ہے تو آپ کا پہلا ردعمل کیا ہوگا۔ ظاہر ہے آپ حیران ہوں گے۔

برطانیہ سے تعلق رکھنے والے 31 سالہ فریڈی بیکٹ نے پیسہ کمانے کا ایک ایسا طریقہ نکالا ہے جس کے بارے میں جان کر ہر کوئی حیران ہے ، فریڈی بیکٹ اپنے فارغ وقت میں 'ماہر ویٹر' کے طور پر کام کرتے ہیں اور امیر لوگوں کی جگہ لمبی قطاروں میں کھڑے ہوکر ان کا کام آسان کرتے ہیں۔ فریڈی ایک مہینے میں اتنا کماتا ہے جتنا لوگ سالانہ کماتے ہیں۔

غیر ملکی میڈیا رپورٹس کے مطابق فریڈی عام طور پر دوسرے لوگوں کے لیے قطار میں کھڑے ہونے کا فی گھنٹہ 20 پاؤنڈز یعنی 4 ہزار پاکستانی روپے سے زائد  معاوضہ وصول کرتے ہیں۔اس طرح  فریڈی لائن میں کام کر کے تقریباً 5 لاکھ روپے ماہانہ کما رہے ہیں۔ کیا یہ حیرت انگیز نہیں ہے؟

رپورٹس کے مطابق فریڈی ایک تاریخی افسانہ نگار ہیں البتہ وہ گزشتہ 3 سال سے اپنے فارغ وقت میں لوگوں کیلئے لمبی قطاروں میں کھڑے ہوکر پیسہ کمارہے ہیں۔

فریڈی کا کہنا ہے کہ ان کے زیادہ تر کلائنٹ امیر لوگ ہیں جن کے پاس خود قطاروں میں کھڑے ہونے کا وقت نہیں یا انہیں پھر اتنا انتظار کرنا اچھا نہیں لگتا تاہم کچھ پیسوں کےعوض وہ قطار میں کھڑے ہوکر ان کا کام آسان کردیتے ہیں۔