کراچی میں ہلکی بارش،سندھ کے مختلف علاقوں میں سیلاب کی صورتحال

کراچی/حیدرآباد :کراچی میں صبح سویرے سے ہی ہلکی بارشوں کا سلسلہ جاری ہے۔ محکمہ موسمیات کے مطابق شہر میں دن بھر بارش کا سلسلہ جاری رہنے کا امکان ہے اور کراچی کا زیادہ سے زیادہ درجہ حرارت 33 ڈگری سینٹی گریڈ تک پہنچ سکتا ہے۔

دوسری جانب ٹنڈو آدم میں روہڑی کنال میں پڑنے والے شگاف اور موسلادھار بارشوں کے باعث سیلاب کی صورتحال پیدا ہو گئی ہے۔ ضلع جامشورو کی تحصیل سیہون میں کچے کے متعدد دیہاتوں میں کھڑی فصلوں میں پانی داخل ہو گیا ہے جب کہ رابطہ سڑکیں بھی زیر آب آ گئی ہیں۔

محکمہ موسمیات کے مطابق بحیرہ عرب سے آنے والے بادلوں کے باعث گزشتہ رات اور صبح ہلکی بارش ہوئی اور مزید بادل شہر کی طرف بڑھ رہے ہیں۔ محکمہ موسمیات نے آج سندھ کے بیشتر ساحلی علاقوں میں بارش کا امکان ظاہر کیا ہے۔ علاوہ ازیں، محکمہ موسمیات کا کہنا ہے کہ شمال مشرقی بلوچستان میں دوسرا طاقتور مون سون سسٹم موجود ہے جس کے تحت مزید بارشیں ہو سکتی ہیں۔

اس صورتحال کے پیش نظر انتظامیہ نے متاثرہ علاقوں میں امدادی کام شروع کر دیئے ہیں۔ ریسکیو اہلکار متاثرہ افراد کو محفوظ مقامات پر منتقل کر رہے ہیں اور متاثرہ علاقوں میں کھانے پینے کا سامان بھی فراہم کیا جا رہا ہے۔