منکی پاکس کے پھیلاؤ پر سخت نگرانی، صورتحال قابو میں ہے، وزارت صحت

اسلام آباد : وزارت قومی صحت نے پاکستان میں منکی پاکس کے پھیلاؤ کو قابو میں رکھنے کا دعویٰ کیا ہے۔ وزارت کے مطابق ملک میں اب تک صرف دو کیسز کی تصدیق ہوئی ہے اور صورتحال پر سخت نگرانی کی جا رہی ہے۔

وزارت کے ترجمان ساجد شاہ کا کہنا ہے کہ ملک بھر میں مشکوک مریضوں کی اسکریننگ مکمل کر لی گئی ہے اور علامات ظاہر ہونے والوں کو ہسپتالوں کے آئسولیشن وارڈز میں منتقل کر دیا گیا ہے۔ اس کے علاوہ وفاقی حکومت نے ایئرپورٹس پر سخت نگرانی کے انتظامات کیے ہیں اور ہیلتھ سیکرٹری ندیم محبوب خود اس عمل کی نگرانی کر رہے ہیں۔

ساجد شاہ نے بتایا کہ اسلام آباد، پشاور اور لاہور ایئرپورٹس پر مشکوک مریضوں کی اسکریننگ کے لیے خصوصی انتظامات کیے گئے ہیں۔ علاوہ ازیں بارڈر ہیلتھ سروسز اسٹاف کو بھی اس حوالے سے بریفنگ دی گئی ہے۔

ہیلتھ سیکرٹری ندیم محبوب نے کہا کہ عالمی ادارہ صحت (ڈبلیو ایچ او) کی جانب سے جاری کی گئی گائڈلائنز پر سختی سے عمل درآمد کیا جا رہا ہے۔ انہوں نے یقین دلایا کہ وزارت قومی صحت خدمات صورتحال کو روزانہ کی بنیاد پر مانیٹر کر رہی ہے اور پاکستان کا بیماریوں سے متعلق نگرانی کا نظام مؤثر اور مضبوط ہے۔