وزیراعلیٰ مریم نوازنے دیگر صوبوں کے طلبہ کیلیے ہونہار اسکالرشپ کی منظوری دے دی

لاہور:وزیر اعلی پنجاب مریم نواز شریف نے دیگر صوبوں کے طلبہ کے لیے ہونہار اسکالر شپ کی منظوری دے دی۔
 وزیراعلیٰ پنجاب مریم نوازکی زیر صدارت ہونے والے اجلاس ہوا ، جس میں پنجاب میں طلبہ کے لیے لیپ ٹاپ کی تعداد بڑھا کر ایک لاکھ 10 ہزار کر دیا گیا ،اس کے علاوہمریم نواز شریف نے ہونہار اسکالرشپ اسکیم کے طلبہ کے لیے خصوصی ہیلپ لائن قائم کرنے کی ہدایت کی۔
دوران اجلاس مریم نواز نے دیگر صوبوں کے طلبہ کے لیے بھی ہونہار اسکالر شپ اسکیم کی منظوری دی۔ دیگر صوبوں کے طلبہ کے لیے بھی پنجاب کی طرح اہلیت کا یکساں معیار مقرر کیا گیا ہے۔ 
پنجاب میں لیپ ٹاپ حاصل کرنے کے لیے کم از کم 65 فیصد اہلیت مقرر کی گئی۔
دوران اجلاس مریم نواز نے گفتگو کرتے ہوئے کہا کہ ہونہاراسکالرشپ اور لیپ ٹاپ ہر بچے کا حق اور حکومت کی ذمہ داری ہے،انہوں نے کہا کہ تعلیم اور یوتھ قوم کی حقیقی انویسٹمنٹ ہے۔
مریم نواز نے کہا کہ میرا دل چاہتا ہے ہر بچے کو لیپ ٹاپ ملے،لیپ ٹاپ اور ہونہار اسکالرشپ دیگر صوبوں کے طلبہ کا بھی حق ہے۔انہوں نے مزید کہا کہ آزاد کشمیر، گلگت بلتستان، بلوچستان اور خیبرپختونخوا سمیت دیگر صوبوں کے طلبہ بھی ہمارے بچے ہیں۔
وزیر اعلی پنجاب کا کہنا تھا کہ میرٹ پر آنے والا ہر بچہ اچھے کالج میں اپلائی کرے فیس ہم دیں گے۔ ماں کی طرح سوچتی ہوں ہربچے کی قسمت بدلنا چاہتے ہیں۔ 
ہونہار اسکالر شپ کے لیے جو پنجاب کا معیار ہے وہی دیگر صوبوں کے طلبا کے لیے مقرر کیا جائے گا۔ طلبا کے لیے کسی بھی اسکیم میں فنڈز کی فراہمی  کو رکاوٹ نہیں بننے دیا جائے گا۔ اجلاس میں پنجاب میں ایک روزہ وی سی کانفرنس اور ٹیک ایکسپوکی منظوری بھی دی گئی۔