بانی پی ٹی آئی کے فیملی ممبرز کو گرفتار کر کے سیاسی تناؤ پیدا کیا جا رہا ہے،بیرسٹر گوہر

اسلام آباد: پاکستان تحریک انصاف (پی ٹی آئی) کے چئیرمین بیرسٹرگوہر نے کہا ہے کہ بانی پی ٹی آئی  کے فیملی ممبرز کو گرفتار کر کے سیاسی تناؤ پیدا کیا جا رہا ہے،ان کا کہنا تھا کہ جب ہم کوشش کر رہے ہیں کہ تناؤ ختم ہو تو گرفتاریاں شروع ہو جاتی ہیں۔

تفصیلات کے مطابق سابق وزیر اعظم عمران خان کی ہمیشرہ علیمہ خان کے دوسرے بیٹے کی گرفتاری پر ردِ عمل دیتے ہوئے بیرسٹر گوہر خان نے کہا کہ بانیٔ پی ٹی آئی کے فیملی ممبرز کو گرفتار کر کے سیاسی تناؤ پیدا کیا جا رہا ہے، کل علیمہ خان کے بیٹے شاہریز کو گرفتار کیا گیا اور آج دوسرے بیٹے کو بھی کر لیا گیا۔

انہوں نے مزید کہا کہ بانیٔ پی ٹی آئی کو آئیسولیٹ کیا جا رہا ہے، اِنہیں اخبار نہیں دیے جا رہے، اِن حرکتوں سے عوام میں نفرت میں اضافہ ہو گا۔

اپنے رد عمل میں ان کا مزید کہنا تھا کہ سیاسی رہنماؤں کے اہل خانہ کو نشانہ بنانا غیر جمہوری رویہ ہے، ایسے اقدامات سیاسی و سماجی ماحول کو مزید کشیدہ کرتے ہیں۔

بیرسٹر گوہر کا مزید کہنا تھا کہ حکومت اور اداروں سے سنجیدگی و تحمل کا مظاہرہ کرنے کا مطالبہ کیا اور کہا کہ ملک کے حالات پہلے ہی نازک ہیں ان میں مزید بگاڑ پیدا نہ کیا جائے، ہم اپیل کرتے ہیں کہ اس طرح کے رویے نہ اپنائے جائیں تاکہ حالات بہتر ہوسکیں۔

بیرسٹر گوہر نے کہا کہ سیاسی انتقام ترک کر کے استحکام اور مثبت رویوں کو فروغ دیا جائے، پاکستانی عوام جمہوری اقدار کے تحفظ کے خواہاں ہیں، سیاسی استحکام کے لیے تمام اسٹیک ہولڈرز کو مثبت کردار ادا کرنا ہوگا۔

خیال رہے کہ پولیس نےعلیمہ خان کے دوسرے بیٹےشیر شاہ کو بھی لاہور سے حراست میں لے لیا ہے، شیر شاہ کو گھر سے کچھ فاصلے سے حراست میں لیے جانے کی اطلاع ہے، شیر شاہ کو جب حراست میں لیا گیا تو وہ والد کے ساتھ عدالت سے واپس آ رہے تھے۔