جنرل ساحر شمشاد مرزا سے بنگلا دیش کے لیفٹیننٹ جنرل کی ملاقات، دفاعی اور سلامتی امور پر تبادلہ خیال

راولپنڈی:چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے بنگلہ دیشی فوج کے کوارٹر ماسٹر جنرل  لیفٹیننٹ جنرل محمد فیض الرحمان نے ملاقات کی جس میں دونوں ملکوں کے درمیان دفاع اور سلامتی کے شعبوں میں تعاون مزید بڑھانے اور دیگر امور پر تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے بنگلہ دیش آرمی کے کوارٹر ماسٹر جنرل لیفٹیننٹ جنرل محمد فیض الرحمان نے جوائنٹ اسٹاف ہیڈکوارٹرز راولپنڈی میں ملاقات کی۔

آئی ایس پی آر نے بتایا کہ دونوں رہنماؤں کے درمیان ہونےوالی ملاقات میں خطے کی سیکیورٹی صورت حال پر تبادلہ خیال کیا گیا۔

ترجمان پاک فوج نے مزید بتایا کہ دوران ملاقات چیئرمین جوائنٹ چیفس نے پاکستان اور بنگلہ دیش کے بڑھتے ہوئے دوطرفہ تعلقات کو اجاگر کیا،اور دونوں ممالک کےمابین دفاع اور سلامتی کے شعبے میں موجودہ تعاون کو مزید بڑھانے کے عزم کا اعادہ کیا گیا۔

ترجمان کے مطابق چیئرمین جوائنٹ چیفس آف سٹاف کمیٹی نے دونوں ممالک کے درمیان دوطرفہ تعلقات کی بڑھتی ہوئی رفتار پر روشنی ڈالی اور دفاعی تعاون کی نئی راہوں کی نشاندہی کی۔

آئی ایس پی آر کے مطابق بنگلہ دیشی معزز مہمان نے پاک افواج کی پیشہ ورانہ صلاحیتوں کو سراہا اور دہشت گردی کے خلاف قربانیوں کو خراج تحسین پیش کیا۔