وزیر اعلی علی امین گنڈاپور کا خیبر میڈیکل کالج کو یونیورسٹی کا درجہ دینے کا اعلان

پشاور: وزیر اعلیٰ خیبر پختونخوا علی امین گنڈاپور نے خیبر میڈیکل کالج کو یونیورسٹی کا درجہ دینے کا اعلان کر دیا۔

تفصیلات کے مطابق وزیر اعلیٰ خیبر پختونخوا علی امین گنڈاپور نے تقریب سے خطاب کرتے ہوئے کہا کہ صحت کی سہولیات دینا ریاست کی ذمہ داری ہے۔ اور صوبے کی آمدنی بڑھ رہی ہے۔ جسے اپنے شہریوں پر خرچ کریں گے۔

 علی امین گنڈاپور نے کہا کہ خیبر میڈیکل یونیورسٹی کا خیبر میڈیکل کالج کے ساتھ کوئی مقابلہ نہیں۔انہوں نے کہا کہ صحت کی سہولیات ریاست کی ذمہ داری ہے، کوشش کررہے ہیں کہ مختلف ڈویژن میں سہولیات فراہم کریں۔

انہوں نےمزید کہا کہ خیبرٹیچنگ ہسپتال میں کارڈیک سرجریزکی سہولیات کیلئے 30 کروڑ روپے جلد مہیا کردیں گے۔

وزیراعلیٰ خیبرپختونخوا کا کہنا تھا کہ صوبے کی آمدنی بڑھ رہی ہے، اپنے شہریوں پر خرچ کریں گے، پیسہ ان سیکٹرز میں لگائیں گے، جہاں ضرورت ہے۔

وزیراعلیٰ خیبرپختونخوا نے کہا کہ ہم تعلیمی نظام کو بہتر کرنے پر کام کررہے ہیں، انہوں نے اساتذہ سے مخاطب ہوتے ہوئے کہا کہ میڈیکل کے طلبہ کے ذہنوں میں یہ بات ڈالیں کہ وہ دور دراز علاقوں میں بھی جایا کریں،تاکہ ان میں دورافتادہ علاقوں میں جاکر خدمات پیش کرنے کا جذبہ پیدا ہوگا۔

انہوں نے کہا کہ ہم ہسپتال اور بنیادی صحت کے مراکز بنالیتے ہیں مگر ہمارے پاس ڈاکٹرز نہیں ہوتے۔

تقریب سے خطاب میں ان کا مزید کہنا تھا کہ ہمیں ڈیمز بنانے چاہئیںتاکہ پانی کی شکل میں آنے والے عذاب رحمت بن جائیں، جہاں ضروری ہوا ڈیم بنائیں گے،ان کا مزید کہنا تھا کہ خیبرپختونخوا کے ساتھ زیادتی ہورہی ہے، نہروں کے لیے وفاق سے فنڈنگ نہیں مل رہے۔