دوسرا ٹی ٹوئنٹی،جنوبی افریقہ کی پاکستان کو 6وکٹوں سے شکست،سیریز1-1سے برابر

تفصیلات کے مطابق ٹیسٹ میچوں کے بعد پاکستان اور ساؤتھ افریقہ کے مابین تین ٹونٹی میچوں کی سیریزکا دوسرامیچ آج قذافی اسٹیڈیم لاہور میں کھیلا گیا جس  میں جنوبی افریقہ نے ٹاس جیت کر فیلڈنگ کا فیصلہ کیا تھا۔قومی ٹیم کی  جانب سے کپتان بابر اعظم اور محمد رضوان نے اننگز کا آغاز کیا۔تاہم 10 کےمجموعی اسکو ر پر کپتان بابر اعظم 5 رنز بنا کر ایل بی ڈبلیو آؤٹ ہوئے،حیدر علی نے 10،حسین طلعت نے 3 رنز بنائے جبکہ افتخار احمد نے 20 رنز کی مزاحمت کی۔ وکٹ کیپر بلے باز محمد رضوان 41 گیندوں پر 51 رنز بنا کر ٹاپ اسکورر رہے۔انہوں نے 6چوکے اور بلند وبانگ چھکا بھی لگایا۔خوشدل شاہ 15 رنز بنا کر کیچ آؤٹ ہوئے جبکہ محمد نواز بغیر کھاتے کھولے کلین بولڈ ہوئے۔فہیم اشرف نے تیز رفتار اننگز کھیلی اور 12 گیندوں پر 30 رنز بنائے جبکہ عثمان قادر نے 4 رنز بنائے۔

اس طرح قومی ٹیم نے مقررہ 20 اوورز میں 7وکٹوں کے نقصان پر 144 رنز بنائے۔ جنوبی افریقہ کی جانب سے پریٹوریس نے 17 رنز کے عوض 5کھلاڑیوں کا شکار کیا جبکہ تبریز شمسی اور پھلکوایونے 1،1 وکٹ حاصل کی۔

ہدف کے تعقب میں جنوبی افریقہ کی جانب سے مایوس کن آغاز کیا گیا اور 21 کے مجموعی اسکور پر شاہین آفریدی نے 2کھلاڑیوں کو پویلین کی راہ دکھا دی تاہم اس موقع پر ہینڈرکس اور وین بیلجون نے 77 رنز کی شاندار شراکت دار ی قائم کر کے میچ کا پانسہ اپنے حق میں کر لیا دونوں نے 42،42 رنز بنائے  جبکہ ڈیوڈ ملر 25 اور کپتان کلاسن 17 رنز بنا کر ناٹ آؤٹ رہے اور جنوبی افریقہ نے 145 رنز کا ہدف 4وکٹوں کے نقصان پر با آسانی16.2 اوورز میں حاصل کر لیا۔ اور اس طرح جنوبی افریقہ نے دوسرے ٹی ٹوئنٹی میچ میں پاکستان کو 6وکٹوں سے شکست دے کر تین میچز کی سیریز 1-1 سے برابر کر دی۔قومی ٹیم کی جانب سے شاہین آفریدی نے 2 جبکہ محمد نواز اور عثمان قادر نے 1،1 وکٹ حاصل کی۔دونوں ٹیموں کے مابین فیصلہ کن معرکہ  کل قذافی اسٹیڈیم لاہور میں کھیلا جائے گا۔

اس سے پہلے دو ٹیسٹ میچز کی سیریز میں قومی ٹیم نے مہمان ٹیم کو 2-0 سے کلین سوئپ کیا تھا۔