کوئٹہ : سرینا چوک کے پاس دھماکہ ،2 پولیس اہلکار شہید

پولیس کے مطابق دھماکا پولیس وین کے قریب ہوا اور دھماکا خیز مواد موٹرسائیکل میں نصب کیا گیا تھا۔

حکام کا کہنا ہے کہ دھماکے کے نتیجے میں 2 پولیس اہلکار شہید  اور 9افراد زخمی ہوگئے جبکہ زخمیوں میں 5 پولیس اہلکار بھی شامل ہیں۔

ریسکیو ذرائع نے بتایا کہ دھماکے کے زخمیوں کو سول اسپتال منتقل کیا جارہا ہے۔پولیس کے مطابق دھماکا اس قدر شدید تھاکہ قریبی عمارتوں کے شیشے ٹوٹ گئے۔

دوسری جانب ڈی آئی جی پولیس کوئٹہ اظہر اکرام  کا کہنا ہے کہ ابتدائی تحقیقات کے مطابق کوئٹہ دھماکا ٹائم ڈیوائس کے ذریعےکیا گیا۔

کوئٹہ میں میڈیا سے گفتگو کرتے ہوئے ڈی آئی جی پولیس نے کہا کہ پولیس اہلکار ڈیوٹی پر تھے کہ قریب کھڑی موٹرسائیکل میں دھماکا ہوا۔دھماکے کے نتیجے میں پولیس کے 2 جوان شہید جبکہ 13 افراد زخمی ہوئے۔ 3 زخمیوں کی حالت تشویشناک ہے۔

ڈی آئی جی پولیس نے کہا کہ زخمیوں کو سول اسپتال میں بہترین طبی امداد دی جارہی ہے، دھماکے کی تحقیقات شروع کردیں۔ڈی آئی جی پولیس نے کہا کہ تھریٹ تھی، اسی لئے ہم الرٹ ہیں۔