آسٹریلوی کپتان ایرون فنچ نے پاکستانی بولر شاہین شاہ آفریدی کوخطرناک قرار دے دیا

غیرملکی خبر رساں ادارے سے گفتگو کرتے ہوئے آسٹریلوی کپتان نے کہا کہ شاہین آفریدی پاکستان کے لیے اچھا کھیل پیش کررہے ہیں اور یہی چیز ہمارے لیے میچ میں خطرہ ہوسکتی ہے۔

ان کا کہنا تھا کہ شاہین نے پورے ٹورنامنٹ میں اچھا کھیل پیش کیا ہے، ہمیں آج ان سے محتاط رہتے ہوئے اپنی وکٹس محفوظ کرنا ہوگی کیوں کہ شاہین کسی بھی دن خطرہ ثابت ہوسکتا ہے۔

فنچ کا کہنا تھا کہ پاکستان نے شاندار کرکٹ کھیلی ہے، پاور پلے یقینی طور پر میچ کا اہم حصہ ہے، میرا خیال ہے کہ وہ جس طرح بلے اور گیند کے ساتھ پاور پلے میں کھیلتے ہیں یہی ان کی کامیابی کا راز ہے۔

آسٹریلوی کپتان کا مزید کہنا تھا کہ ان کی ٹیم چاہے پہلے بولنگ کرے یا بیٹنگ، کسی بھی صورتحال میں جیتنے کی صلاحیت رکھتی ہے۔