دنیا بھر میں منکی پاکس کیسز کی تعداد 18 ہزار سے تجاوز کرگئی 

ترکیہ ذرائع ابلاغ نے عالمی ادارہ صحت کے ڈائریکٹر جنرل ٹیڈروس ایڈہانوم گیبریوسس کے حوالے سے بتایا کہ دنیا بھر میں منکی پاکس کیسوں کی تعداد 18 ہزار سے تجاوز کر گئی ہے۔

انہوں نے ادارے کے جنیوا مرکز میں منعقدہ پریس کانفرنس کے دوران منکی پاکس وائرس کے تازہ اعداد و شمار کے بارے میں بریفنگ دی۔

انہوں نے کہا کہ اب تک 78 ممالک سے 18 ہزار کیسوں کی تصدیق ہو چکی ہے۔ کیسزکے 70 فیصد کا تعلق یورپی علاقے اور 25 فیصد کا تعلق امریکی علاقے سے ہے۔

جنرل ٹیڈروس نے کہا ہے کہ مریضوں کی 10 فیصد تعداد کو ہسپتال منتقل کر دیا گیا ہے۔ 

انہوں نے کہا کہ متاثرہ ممالک اس خطرے کو سنجیدگی سے لینے اور اس کے پھیلائو کو روکنے کے لیے ضروری حفاظتی تدابیر اپنائیں۔

واضح رہے کہ منکی پاکس چیچک کی طرح ایک بیماری ہے لیکن اس کی شدت چیچک سے کم ہے ۔ منکی پاکس کے متاثرہ مریض کے جسم پر چھوٹے چھوٹے دانے نکل آتے ہیں ، اس کے علامات میں بخار، سردرد اور جسم میں تھکاوٹ ہونا شامل ہیں ۔

منکی پاکس جنگلی جانوروں خصوصا زمین کھودنے والے چوہوں اور لنگوروں میں پایا جاتا ہے اور اکثر ان سے انسانوں کو بھی منتقل ہو جاتا ہے۔