ایران کے صوبہ سیستان-بلوچستان میں حملہ: فائرنگ سے 5 پولیس اہلکار جاں بحق

ایران کے صوبہ سیستان-بلوچستان میں نامعلوم مسلح افراد کے حملے میں کم از کم پانچ پولیس اہلکار جاں بحق ہو گئے۔

غیر ملکی خبر رساں ادارے ’اے ایف پی‘ کے مطابق، ایرانی میڈیا نے اطلاع دی ہے کہ ایرانشہر کے قریب گشت پر مامور دو پولیس یونٹوں کو حملے کا نشانہ بنایا گیا۔

ایرانی پولیس نے ایک سرکاری بیان میں تصدیق کی کہ اس دہشت گرد حملے میں پانچ امن و امان کے اہلکار جان کی بازی ہار گئے۔

یہ واقعہ پاکستان اور افغانستان کی سرحد کے قریب واقع صوبہ سیستان-بلوچستان میں پیش آیا، جو کئی برسوں سے سیکیورٹی فورسز اور مسلح گروپوں کے درمیان جھڑپوں کا مرکز بنا ہوا ہے۔ ان گروپوں میں منشیات کے اسمگلر، علیحدگی پسند اور دیگر شدت پسند عناصر شامل ہیں۔

یہ صوبہ، جو ایران کے غریب ترین علاقوں میں شمار ہوتا ہے، سنی مسلمان بلوچ اقلیت کی بڑی آبادی پر مشتمل ہے، جو شیعہ اکثریتی ایران میں اکثر سماجی اور معاشی محرومیوں کا شکار رہی ہے۔

ایرانی پولیس کے مطابق، اہلکار معمول کے گشت پر تھے جب ان پر اچانک فائرنگ کی گئی۔ مقامی میڈیا نے ایک پولیس وین کی تصویر شائع کی ہے جس پر گولیوں کے نشانات واضح تھے، جب کہ جائے وقوعہ پر لاشیں بھی دیکھی گئیں۔

ایرانی نیم سرکاری خبر ایجنسی ’فارس‘ کے مطابق، حملہ آوروں کی شناخت اور گرفتاری کے لیے کارروائیاں جاری ہیں۔

تاحال کسی گروپ نے اس حملے کی ذمہ داری قبول نہیں کی ہے۔