اپوزیشن کرپٹ سسٹم کی پیداوار ہے:عمران خان

تفصیلات کے مطابق وزیراعظم ہاوس میں ظہرانے کے بعد اتحادی ارکان پارلیمنٹ سے خطاب  کرتے ہوئے وزیراعظم عمران خان کا کہنا تھا کہ الیکشن کمیشن کا کیا کام تھا جو الیکٹرانک ووٹنگ مشین پر شور مچایا۔

ان کا کہنا تھا کہ سمجھ نہیں آتی کہ الیکشن کمیشن ای وی ایم کی مخالفت کیوں کر رہا ہے،2018میں سابق حکومت کاالیکشن کمیشن تھامگردھاندلی کاالزام لگایاگیا۔

وزیراعظم عمران خان کا کہنا تھا کہ ان کا سیاست میں آنےکا مقصد پاکستان کو فلاحی اسلامی ریاست بنانا تھا اور وہ  ملک کوبدلنےکیلئے سیاست میں آئے تھے۔

ان کا کہنا تھا کہ اخلاقیات ختم ہونے پرکرپشن شروع ہوتی ہے،جو قوم انصاف نہیں کرسکتی وہ تباہ ہوجاتی ہے،چار حلقے کھلوانے کا مقصد الیکشن کو صاف شفاف کروانا تھا۔

انہوں نے کہا ہے کہ سب جانتے ہیں کہ  سینیٹ کے الیکشن میں پیسہ چلتا ہے،ہم کہتے ہیں اوپن بیلٹ الیکشن ہونا چاہیے، سیکرٹ بیلٹ پر ہمیشہ پیسہ چلتا ہے،سینیٹ انتخابات کیسے ہوتے ہیں،ویڈیوز بھی سامنے آئیں ۔

وزیراعظم کا کہنا تھا کہ جب انتخابات ہوتے ہیں تو کوئی جماعت نتائج تسلیم نہیں کرتی ،ای وی ایم مشین انتخابی دھاندلی سے بچاو کا بہترین طریقہ ہے۔

ان کا مزید کہنا تھا کہ جس معاشرے کی اخلاقیات قائم ہو تو آپ اس قوم کو ایٹم بم سے بھی ختم نہیں کرسکتے اور جب اخلاقیات ختم ہوتیں ہیں تو کرپشن اپنی جگہ بنا لیتی ہے اور اپوزیشن کرپٹ سسٹم کی پیداوار ہے جو تبدیلی کی خواہش مند نہیں ہے۔