اشیائے خوراک کی برآمدات میں جاری مالی سا ل کے پہلے 5 ماہ میں 37 فیصد کا اضافہ

اسلام آباد: اشیائے خوراک کی برآمدات میں جاری مالی سا ل کے پہلے 5 ماہ میں سالانہ بنیادوں پر 37 فیصد کا اضافہ ریکارڈکیاگیا۔ پاکستان بیورو برائے شماریات کے اعدادوشمار کے مطابق جولائی سے نومبر 2023 تک کی مدت میں اشیائے خوراک کی برآمدات سے ملک کو 2.641 ارب ڈالر زرمبادلہ حاصل ہوا جو گزشتہ مالی سال کی اسی مدت کے مقابلہ میں 37 فیصد زیادہ ہے۔

گزشتہ مالی سال کی اسی مدت میں 1.926 ارب ڈالر کی اشیا خوراک کی برآمدات ریکارڈکی گئی تھی۔ نومبر میں اشیائے خوراک کی برآمدات کا حجم 696 ملین ڈالر ریکارڈکیاگیا جو گزشتہ سا ل نومبر کے مقابلہ میں 61 فیصد زیادہ ہے۔ گزشتہ سا ل نومبر میں 433 ملین ڈالر مالیت کی اشیائے خوراک کی برآمدات ریکارڈکی گئیں۔ اکتوبر کے مقابلہ میں نومبر میں اشیائے خوراک کی برآمدات میں ماہانہ بنیادوں پر 5 فیصد کی نمو ہوئی۔

اکتوبر میں 664 ملین ڈالر مالیت کی اشیائے خوراک کی برآمدات ریکارڈکی گئیں جو نومبر میں بڑھ کر 696 ملین ڈالر ہو گئی۔ اعدادوشمار کے مطابق مالی سال کے پہلے 5 ماہ میں اشیائے خوراک کی درآمدات 3.350 ارب ڈالر ریکارڈکی گئی جو گزشتہ مالی سال کی اسی مدت کے مقابلہ میں 18 فیصد کم ہے۔ گزشتہ مالی سال کی اسی مدت میں اشیائے خوراک کی درآمدات پر 4.081 ارب ڈالر کا زرمبادلہ صرف ہوا تھا۔