یوکرینی قیدیوں کو لے جانے والا روسی طیارہ گر کر تباہ

روس کا ایک ہیوی لفٹ ملٹری ٹرانسپورٹ طیارہ IL-76، جو 65 یوکرینی جنگی قیدی کو لے کر جارہا تھا، بیلگوروڈ علاقے میں گر کر تباہ ہو گیا ہے۔  طیارہ پائلٹ کے کنٹرول سے باہر ہو گیا اور رہائشی علاقے کے قریب گر کر تباہ ہو گیا۔

ماسکو کی وزارت دفاع کے حوالے سے بتایا کہ ماسکو وقت کے مطابق صبح 11 بجے ایک IL-76 طیارہ معمول کی پرواز کے دوران بیلگوروڈ کے علاقے میں گر کر تباہ ہو گیا۔ طیارے میں یوکرین کی فوج کے 65 گرفتار فوجی سوار تھے، جنہیں تبادلے کے لئے بیلگوروڈ کے علاقے میں لے جایا جا رہا تھا۔ اس کے ساتھ عملے کے چھ ارکان اور تین روسی فوجی بھی تھے۔

ادھر روس کی پارلیمنٹ کے اسپیکر ویاچسلاو ولوڈن نے یوکرین پر الزام عائد کرتے ہوئے کہا کہ جنگی قیدیوں کو لے جانے والے مسافر طیارے کو مار گرایا ہے۔ یوکرین نے اپنے ہی فوجیوں کو ہوا میں گولی مار دی۔

دوسری جانب اے ایف پی نے یوکرین کے مقامی میڈیا کے حوالے سے بتایا کہ ان کی دفاعی فورسز نے روسی طیارے کو مار گرایا ہے کیونکہ یہ طیارہ S-300 زمینی فضائی دفاعی نظام کے لیے میزائل لے جا رہا تھا۔

یاد رہے کہ روس کا  IL-76 طیارہ فوجیوں، کارگو اور فوجی ساز و سامان جیسے ٹینک، ہووٹزر اور گولہ بارود کو لے جانے کے لیے ڈیزائن کیا گیا تھا۔