ملک بھر میں موسلادھار بارشوں کا امکان، لینڈ سلائیڈنگ کا خدشہ 

اسلام آباد: محکمہ موسمیات نے آئندہ ہفتے مون سون کی شدت میں اضافے کا امکان ظاہر کرتے ہوئے ملک بھر میں تیز ہواؤں اور گرج چمک کے ساتھ بارشوں کی پیش گوئی کر دی۔

محکمہ موسمیات کے مطابق 14 سے 17 اگست تک اسلام آباد، کشمیر، خیبر پختونخوا اور گلگت بلتستان میں گرج چمک کے ساتھ بارش کا امکان ہے جبکہ 18 سے 21 اگست کے دوران خیبر پختونخوا، پنجاب، بلوچستان اور سندھ کے مختلف علاقوں میں بارشوں کا سلسلہ جاری رہنے کی پیشگوئی ہے، اسی دوران18 سے 21 اگست کے دوران ملک کے بالائی علاقوں میں موسلادھار بارش کے امکانات ہیں۔

پنجاب کے کئی شہروں میں وقفے وقفے سے بارش کا امکان ہے جبکہ سندھ اور بلوچستان کے مختلف علاقوں میں بھی بارش اور تیز ہوائیں چلنے کی توقع ہے۔ شدید بارشوں کے باعث برساتی نالوں میں طغیانی کا خطرہ ہے ، پہاڑی علاقوں میں لینڈ سلائیڈنگ اور ٹریفک کی روانی متاثر ہونے کا خدشہ ہے۔

نشیبی علاقوں میں پانی جمع ہونے کا امکان ہے جبکہ کمزور انفراسٹرکچر اور کچے گھروں کو نقصان پہنچ سکتا ہے۔ محکمہ موسمیات نے شہریوں کو ہدایت دی ہے کہ وہ موسم کی شدت کے دوران محتاط رہیں اور غیر ضروری سفر سے گریز کریں۔